Það sem af er árinu hafa komið upp 481 atvik á bráðamóttöku Landspítalans þar sem eitthvað hefur farið úrskeiðis við meðhöndlun sjúklinga. Atvikum sem þessum hefur fjölgað á síðustu árum. Til samanburðar má nefna að 318 slík atvik komu upp árið 2009.

Morgunblaðið skýrir frá þessu í dag. Haft er eftir Elísabet Benedikz, yfirlækni á gæða- og sýkingarvarnardeild sjúkrahússins, að augljósar orsakir fyrir þessu sé að finna í umhverfi bráðamóttökunnar. Þar sé örtröð sjúklinga, álag á starfsfólk hafi aukist, flæði yfir á viðeigandi þjónustustig (legudeildir og gjörgæsludeild) sé ekki eins og það eigi að vera vegna örtraðar á legudeildum og skorts á plássum og starfsfólki.

Á tíu ára tímabili hafa alvarleg atvik, sem eru skráð í flokk 3, verið 18 talsins en í þennan flokk falla atvik þar sem sjúklingar hafa orðið fyrir varanlegum miska eða látist. Af þessum 18 hafa 12 orðið á síðustu þremur árum og tvö það sem af er þessu ári.

Í flokki 2, sem eru meðalalvarleg atvik, hefur fjöldinn verði nokkuð svipaður síðustu fimm ár.

Mesta fjölgunin hefur orðið í flokki 1, þar sem minna alvarleg atvik eru skráð. Atvikum tengdum lyfjameðferð hefur fjölgað mikið síðustu ár og einnig hefur byltum á bráðamóttökunni fjölgað.

Elísabet benti á að rétt sé að hafa í huga að bráðaþjónusta hjartagáttar færðist inn á bráðadeild G2 frá og með desember á síðasta ári. Atvikin eru flest á bráðadeild G2 sem er meginstarfseining bráðamóttökunnar eða 411 það sem af er ári.