Halla Gunnarsdóttir, varaformaður samhæfingarhóps stjórnvalda um mansalsmál, segir Ísland búa yfir rétta infrastrúktúr til að taka á mansalsmálum. „Við þurfum að finna leiðir til að nýta það sem við höfum þannig við séum ekki að missa nein mál niður og við náum að halda vel utan um mögulega þolendur mansals,“ segir Halla.
Þetta kemur fram í hádegisfréttum Stöðvar 2 en þar segir Halla að nauðsynlegt sé að skoða hvernig hefur verið tekið á þessu hjá lögreglunni. Af sjötíu og fjórum mansalsmálum sem hafa veriðá borði lögreglunnar síðustu fjögur ár fór aðeins eitt í ákærumeðferð en það var fellt niður.
„Hvar eru þessir blokkerar? Við höfum ekki nógu góð gögn um það hvað við erum ekki að gera rétt. En með þessum samhæfingarhópi erum við að taka alla þekkingu á málaflokknum og setja saman inn í eitt herbergi,“ segir Halla.
„Ég held að við eigum að geta gert Ísland að mansalsfríu landi. Við höfum allan infrastrúkturinn til að gera það, við erum með sterka kvennahreyfingu, við erum með mjög góða löggjöf hvað varðar vændi og eftirspurn eftir vændi. Við erum með mjög sterka verkalýðshreyfingu, hún er sterkari en í flestum löndum heims.“