Í þættinum vildi Páll meina að vísindin hafi þynnst út auk þess sem gæði þeirra hafa minnkað í kjölfar fjölgunar á vísindamönnum. Þetta birtist meðal annars í umræðunni um loftslagsmál. Páll benti á það í þættinum að með fjölgun vísindamanna hafi vikið ákveðin gildi auk grunnreglu vísindanna og nú skiptist vísindamenn í tvo hópa.
”…þá sem trúa á loftslagsbreytingar án þess að setja fyrirvara við það og svo eru það hinir sem fylgja þeirri reglu vísindanna að efast og trúa ekki öllu að óreyndu, hinn hópurinn hefur svo Gretu Thunberg sem getur ekki vitað neitt um loftslagsmál, hún er einfaldlega of ung“
Talið berst að fréttum frá Svíþjóð. Þar fór fram matarhátíð fyrir stuttu en á hátíðinni var aðaláherslan á mat framtíðarinnar. Í einni málstofunni setti sænski atferlisfræðingurinn Magnus Söderlund fram nýstárlega hugmynd um hvernig er hugsanlega hægt að bjarga loftslaginu.
Í einföldu máli gekk boðskapur Magnusar út á það að borða mannakjöt í stað annars kjöts til að bjarga loftslaginu
„Þegar rætt er um að borða mannakjöt er það stórt tabú sem erfitt er að brjóta. Af þeim sökum held ég að þetta muni aldrei verða mikið stundað í hinum vestræna heimi og hvað þá á okkar æviskeiði. Flestum finnst þetta mjög ógeðslegt og undarlegt. Við reynum nú að öðlast skilning á af hverju viðhorfið er svona.“
Pétur Gunnlaugsson benti þá á að það sé til lausn við þessu öllu saman. Lausnin hans myndi leysa hamfarahlýnunina auk annarra mála sem hafa verið mikið í umræðunni að undanförnu.
„Það er ein lausn í þessu. Það er að sameina fóstureyðingar, mannát og líka berjast gegn þessari vá. Þú getur tengt þetta saman, að leyfa fóstureyðingar fram að fæðingu, síðan eru þau matreidd, prótín í því er það ekki? Það er ekki hægt að segja að það sé verið að drepa neinn því þetta er „löglegt“ eins og þetta er sett fram.“
Það var glöggur lesandi DV sem tók eftir þessu en honum var brugðið við ummæli Péturs.
„Ég hélt að bara Grýla og mannætur vildu borða börn, en Pétur virðist vera kominn í þann hóp. Þetta var ógeðslegt á að hlusta.“