Heildarkostnaður lögreglunnar á höfuðborgarsvæðinu vegna heimsóknar Mike Pence, varaforseta Bandaríkjanna, hingað til lands á dögunum nam 14,1 milljón króna.
Frá þessu var greint í fréttum RÚV í morgun.
Pence stoppaði stutt á Íslandi og var hér í sjö klukkustundir. Hafa ber í huga að þessi kostnaður á aðeins við um lögregluna á höfuðborgarsvæðinu en ekki embætti lögreglunnar á Suðurlandi og Norðurlandi eystra. Mikill viðbúnaður var vegna heimsóknar Pence hingað til lands.
Kostnaður við heimsókn Pence var mun meiri en kostnaður við heimsókn Angelu Merkel, kanslara Þýskalands, hingað til lands og forsætisráðherra allra Norðurlandanna. Hópurinn kom hingað til lands í ágústmánuði og var hér á landi í tvo sólarhringa. Heildarkostnaður vegna heimsókna þeirra nam 5,5 milljónum króna.