Óhætt er að segja að hegðun ferðamanns við Skógafoss hafi vakið miklar umræður á samfélagsmiðlum eftir að myndir birtust af honum fáklæddum við brún fossins.

Myndin birtist fyrst á Facebook-síðunni Iceland Q&A í gærkvöldi og þá hefur henni verið deilt í Facebook-hópinn Bakland ferðaþjónustunnar.

„Hvað sem þú gerir, ekki vera þessi fáviti þegar þú heimsækir Ísland,“ segir Nora McMahon, sem birti myndina upphaflega á Iceland Q&A Facebook-síðunni. Nora segist hafa talið að hún yrði vitni að því að maðurinn færi niður fossinn, en sem betur fer kom ekki til þess.

Þá hafa talsverðar umræður verið um myndina á Baklandi ferðaþjónustunnar. „Þetta er það heimskasta sem ég hef séð,“ segir einn á meðan annar bætir við: „Þessi maður á ekkert með það að eyðileggja dag þeirra sem horfa á hann drepast.“

Aníta Björk Jóhannsdóttir Randíardóttir, landvörður í Dyrhólaey og Skógafossi, segir í samtali við RÚV að engin skilti séu á svæðinu sem beinlínis vara fólk við að fara í fossinn. Fossinn sé þó afgirtur og viðvörunarskilti séu til staðar. Þá segist Aníta aldrei hafa séð neitt í líkingu við þetta áður.

„Við höfum aldrei fengið neitt slíkt á okkar borð en fólk er alltaf að fara út fyrir merkingingar og girðingar og við grípum fólk við það margoft á dag en aldrei eitthvað líkt þessu. Þetta er svolítið ýkt og er náttúrúlega bara stórhættulegt,“ segir hún.