Klukkan tíu í gærkvöld var björgunarsveit á Seyðisfirði kölluð út til leitar í fjalllendi í Fjarðardal. Tilkynnt var um neyðarköll úr fjallshlíðunum ofan við golfvöllinn. Fyrstu hópar björgunarfólks voru komnir á staðinn tuttugu mínútur yfir tíu og hófu leit á svæðinu, fótgangandi og með drónum.
Stuttu síðar, um 40 mínútum eftir að útkall barst, fannst slösuð kona liggjandi í hlíðinni ofan við golfvöllinn. Hún lá í læk, var mjög kvalin og björgunarsveitarfólkið hlúði að henni á meðan beðið var eftir frekari mannskap. Kallaðar voru út fleiri björgunarsveitir á svæðinu ásamt sjúkrabíl sem kom með lækni frá Egilsstöðum.
Konan hafði verið á göngu, fallið og slasast á baki. Hún var mikið verkjuð en þegar læknir kom á staðinn var hægt að verkjastilla hana og í framhaldinu flytja hana niður fjallið. Hún var komin um borð í sjúkrabíl við golfvöllinn klukkan hálf eitt í nótt og fór þaðan til Egilsstaða í sjúkraflug.
Meðfylgjandi eru myndir af vettvangi