Lögreglan á höfuðborgarsvæðinu fékk býsna óvenjulega tilkynningu á sjötta tímanum í gærkvöldi. Tveir ökumenn sem áttu leið um Reykjanesbraut áttu þar í miklum og hörðum útistöðum á rauðu ljósi.
Forsaga málsins er sú að annar mannanna hafði að mati hins ekið eins og vitleysingur. Hann hefði bæði ekið á strætóakrein og tekið fram úr fimm bifreiðum. Maðurinn furðaði sig á þessu og þegar bifreiðarnar stöðvuðu á rauðu ljósi spurði hann ökumanninn hvað hefði gengið á.
Ökumaðurinn sem ekið hafði ógætilega brást ekki vel við afskiptasemi mannsins og sagði honum meðal annars að hann væri ekki lögreglan. Að svo búnu hefði hann hrækt á bifreið mannsins. Þetta fór ekki vel í eiganda bifreiðarinnar sem kastaði kókflösku inn í bifreiðina. Maðurinn kastaði henni til baka en þá brá eigandi kókflöskunnar á það ráð að kasta kaffibolla í hinn bílinn með þeim afleiðingum að eitthvert tjón varð.
