Þó að Ísland sé ekki ýkja stórt getur verið mikill munur á veðurfari milli landshluta. Þetta þekkja flestir Íslendingar; þannig hefur veðrið á suðvesturhluta landsins verið eitt það besta lengi vel en íbúar í öðrum landshlutum hafa ekki verið jafn heppnir.
Þetta á til dæmis við um Langanes og önnur svæði á norðausturhluta landsins. Líney Sigurðardóttir, íbúi á Þórshöfn, segir til dæmis við Morgunblaðið í dag að sumarið hafi verið hrein hörmung.
„Hér hefur allt verið grátt í sumar, blautt og kalt. Hreinasta hörmung. Við í vinkvennahópnum lýsum þessu sem ömurlegasta sumri í lífi okkar,“ segir hún. Þannig hafa verið þokur dögum og vikum saman í bland við úrkomu. Þá hafa hitatölur verið lágar miðað við árstíma.
Veðrið í sumar hefur haft sín áhrif á fólk á svæðinu. Bændur hafa til dæmis átt erfitt með heyskap í vætutíðinni sem verið hefur og hefur hey hafi nú legið á túnum í 2 til 3 vikur. „Það lítur ekki vel út með það. Það útvatnast á túnunum og skemmist, því miður,“ hefur Morgunblaðið eftir Kristínu Kristjánsdóttur, fyrrverandi bónda á Syðri-Brekkum.