Lögreglan á höfuðborgarsvæðinu fékk tilkynningu um líkamsárás á ellefta tímanum í gærkvöldi, en þar hafði kona slegið mann í höfuðið með glasi.
Atvikið átti sér stað í Hafnarfirði, að því er segir í dagbók lögreglu, og blæddi mikið úr höfði mannsins. Maðurinn var fluttur á slysadeild til aðhlynningar en konan var vistuð í fangageymslu lögreglu.
Fleiri mál komu inn á borð lögreglu í gærkvöldi og í nótt. Þannig hugðust lögreglumenn stöðvað för ökutækis í Háaleitis- og Bústaðahverfi rétt fyrir tvö í nótt en ökumaðurinn sinnti ekki stöðvunarmerkjum lögreglu. Síðar kom í ljós að þessi sami ökumaður hafði fyrr um kvöldið verið stöðvaður fyrir of hraðan akstur og var hann þá sviptur ökuréttindum. Maðurinn var handtekinn og vistaður í fangaklefa.
Þá var tilkynnt um umferðaróhapp klukkan sjö í gærkvöldi en þar hafði bifreið verið ekið á þrjár bifreiðar við fjölbýlishús í Breiðholti. Íbúar höfðu stöðvað akstur konunnar sem var undir stýri og var hún handtekin þegar lögregla kom á vettvang.
Þá slasaðist ökumaður á Suðurlandsvegi við Rauðhóla um hálf níu leytið í gærkvöldi þegar hann ók út af veginum. Bifreiðin fór nokkrar veltur og slasaðist ökumaðurinn mikið, að sögn lögreglu. Hann var fluttur með sjúkrabíl á slysadeild til aðhlynningar en lögregla þurfti að loka veginum meðan unnið var á vettvangi. Ekki er vitað frekar um meiðsl ökumannsins.