Ekki liggur fyrir hvort kvikmyndin Being John Malkovich hafi veitt leigusala einum í New York innblástur. Leigusalinn sem um ræðir ákvað að fara nokkuð óvenjulega leið til að fjölga fermetrunum í húsnæði sínu á Manhattan og græða um leið meiri pening.
Í frétt Business Insider kemur fram að leigusalinn hafi skipt einni hæð í húsinu í tvennt – lárétt – þannig að mjög lágt var til lofts á báðum hæðum. Hann leigði svo lítil herbergi til áhugasamra. Kostaði hvert herbergi um 600 Bandaríkjadali, rúmar 70 þúsund krónur.
Þetta er að sjálfsögðu kolólöglegt og hafa borgaryfirvöld nú lagt sekt á leigusalann sem þarf að reiða fram rúmlega 144 þúsund dali. Engir gluggar voru í mörgum herbergjanna og þá voru brunavarnir algjörlega ófullnægjandi.
Annar leigusali í sama húsi hafði gert það sama á efstu hæð hússins og stendur til að sekta hann um tæplega 140 þúsund dali.