Kona sem handtekin var í dag er Gleðigangan fór niður Bankastræti er sjálf hinsegin. Hún var ekki að mótmæla Gleðigöngunni og raunar segist hún ekki hafa verið að mótmæla neinu heldur lenti hún inni á lokuðu svæði. Þetta kemur fram á Vísir.is. Þar segir konan:

„Það er ógeðslega sárt að vera hinsegin og vera tekin á þessum degi, bara fyrir hver þú ert, ekki fyrir eitthvað sem þú ert að gera.“

Konan er þekktur mótmælandi og er í samtökunum No Borders sem berjast fyrir réttindum flóttamanna. Hún segir að lögreglan hafi kannast við sig og það hafi verið helsta ástæðan fyrir því að hún var tekin fyrir. Einnig hafði hún hulið andlit sitt. Í frétt Vísis segir enn fremur:

„Elínborg var síðan færð á lögreglustöðina við Hverfisgötu þar sem henni var sleppt með þeim varnaðarorðum að hún skyldi ekki reyna að mótmæla frekar í kring um Gleðigönguna, annars fengi hún ekki að „njóta hátíðarinnar.“

Einnig kemur fram í fréttinni að lögregla hafi fengið upplýsingar um að hópur akvítvista ætlaði að mótmæla á meðan Gleðigangan færi fram.