Um tíuleytið í gærkvöld var tilkynnt til lögreglu um mann á hóteli í Reykjavík í annarlegu ástandi. Lögreglumenn komu á vettvang og töldu manninn vera með þýfi í sinni vörslu. Maðurinn reyndi að hlaupa frá lögreglumönnunum en án árangurs. Þá veitti hann mótspyrnu við handtöku. Maðurinn var vistaður í fangaklefa.
Þetta kemur fram í dagbók Lögreglunnar á höfuðborgarsvæðinu. Þar segir einnig frá því að laust fyrir miðnætti var karlmaður handtekinn á heimili í miðbænum grunaður um líkamsárás. Var hann vistaður í fangaklefa.
Þá var tilkynnt í gærdag um mjög drukkinn mann að stela vörum úr verslun á svæði lögreglustöðvar 4, sem er Grafarvogur, Mosfellsbær og Árbær. Maðurinn var handtekinn og vistaður í fangageymslu sökum ástands síns.