Lögreglan á höfuðborgarsvæðinu handtók karl og konu í morgun en karlinn hafði áður verið stöðvaður í umferðinni vegna gruns um akstur undir áhrifum fíkniefna og án ökuréttinda.
Að því er segir í skeyti lögreglu var konan handtekin fyrir afskiptasemi og truflun á störfum lögreglu í málinu en hún hafði meðal annars barið í lögreglubifreiðina og gefið svo upp rangt nafn. Báðum var sleppt að lokinni skýrslutöku.
Fleiri mál komu á borð lögreglu í morgun. Tilkynnt var um innbrot í vinnuskúr á byggingasvæði en ekki liggur fyrir hvort einhverju var stolið í innbrotinu. Þá var annar ökumaður handtekinn vegna gruns um akstur undir áhrifum fíkniefna en hann hafði áður verið sviptur ökuréttindum. Maðurinn var látinn laus eftir sýnatöku.