Lögreglan á Suðurlandi hefur tekið þá ákvörðun að bíða með frekari leit að belgískum ferðamanni sem talið er að hafi fallið útbyrðis af kajak á Þingvallavatni á laugardag.
Þetta kemur fram í skeyti sem lögreglan birti nú á tólfta tímanum.
Leit að manninum hefur engan árangur borið en mannlaus kajak og bakpoki fundist á floti á sunnanverðu vatninu við Villingavatn. Leitað hefur verið úr lofti, láði og legi en án árangurs sem fyrr segir.
„Lögreglan hefur verið í sambandi við aðstandendur mannsins sem er belgískur og hefur ekkert heyrst frá honum frá því fyrir á laugardag. Því eru yfirgnæfandi líkur á því að hann hafi siglt út á vatnið á kajaknum á laugardag og fallið útbyrðis, en strekkingsvindur hefur verið á svæðinu og aðstæður til siglinga ekki verið góðar,“ segir í tilkynningu lögreglu.
Þá segir lögregla að óvíst sé hvar maðurinn lagði af stað út á vatnið og því er leitarsvæðið nokkuð stórt og umfangsmikið. Búið er að sigla um vatnið allt og ganga fjörur meðfram því .
„Lögreglan hefur því tekið þá ákvörðun að bíða með frekari leit í bili en taka stöðuna aftur í fyrramálið. Kafarasveit frá sérsveit Ríkislögreglustjóra er að fara yfir möguleika á því að kafa niður að inntaki við Steingrímsstöð,“ segir enn fremur í skeyti lögreglu.