Tveir voru handteknir í umfangsmiklum aðgerðum lögregluliðanna á höfuðborgarsvæðinu og Suðurnesjum og tollyfirvalda gegn innflutningi og sölu á ólöglegum lyfjum og sterum á fyrri hluta ársins, eða frá miðjum janúar og fram í byrjun maí, en samtals var lagt hald á 11.565 steratöflur.
Þetta kemur fram í tilkynningu frá lögreglunni á höfuðborgarsvæðinu. Þar kemur einnig fram að málið er hluti af aðgerðum sem tengjast Europol, en á fyrrnefndu tímabili var lagt hald á mikið magn af lyfjum og sterum í fjölmörgum löndum.
Hér heima voru stöðvaðar sendingar sem reynt var smygla til landsins með flugi og í pósti, en alls var um ellefu tilvik að ræða. Aðgerðirnar eru liður í baráttu Lögreglunnar á höfuðborgarsvæðinu gegn skipulagðri brotastarfsemi.
Í lok tilkynningarinnar er lögreglan með skilaboð til almennings:
„Við minnum á upplýsingasíma lögreglu 800 5005. Í hann má hringja nafnlaust til að koma á framfæri upplýsingum um skipulagða brotastarfsemi, eða önnur brot sem fólk hefur vitneskju um. Ábendingum um brot má jafnframt koma á framfæri í einkaskilaboðum á fésbókarsíðu Lögreglunnar á höfuðborgarsvæðinu.“