Fréttablaðið sagði frá því í vikunni að ráðuneyti og stofnanir sem undir þau heyra keyptu auglýsingar og kostaðar dreifingar á samfélagsmiðlum fyrir tæplega tuttugu milljónir á árunum 2015 til 2018. Félagsmálaráðherrann Ásmundur Einar Daðason vísaði því á bug að auglýsingakaup væri liður í stefnu yfirvalda að styrkja íslenska fjölmiðlun. Það er hins vegar ekki heil brú í því svari því í gegnum tíðina hefur styrkur frá ríkinu til fjölmiðla falist óbeint í birtingu á ýmiss konar auglýsingum og tilkynningum. Nú er hins vegar leitast meira og meira við það að styrkja erlend stórfyrirtæki, í stað þess að halda peningunum innan íslenskra fjölmiðla. Í raun hefur auglýsingapeningur til samfélagsmiðlarisanna margfaldast 2015 til 2018 og á því væntanlega aðeins eftir að hækka. Alveg sama hve góð ríkisstjórnin telur sig vera við fjölmiðla með umdeildu fjölmiðlafrumvarpi, þá virðist alvarleg hugsanavilla standa á bak við þá gervigóðmennsku.