Nú bíða rúmlega sex þúsund mál afgreiðslu hjá ákærusviði lögreglunnar á höfuðborgarsvæðinu. Elsta málið er frá 2008. Þetta eru mál sem hafa verið til rannsóknar hjá embættinu og bíða þess nú að tekin verði afstaða til hvort ákært verður í þeim eða þau felld niður.

Fréttablaðið skýrir frá þessu í dag. Hulda Elsa Björgvinsdóttur, sviðsstjóri ákærusviðs, sagði í samtali við Fréttablaðið í febrúar í fyrra að 4.000 mál biðu afgreiðslu og væri það meira en venja væri til því yfirleitt væru 2.000 til 3.000 mál til meðferðar á hverjum tíma.

En nú hefur staðan versnað enn frekar. Samkvæmt svörum frá embætti lögreglunnar á höfuðborgarsvæðinu var töluverð hreyfing á starfsfólki innan réttarvörslukerfisins 2017 og 2018 og hafði það mikil áhrif á ákærusviðið. Tíu ákærendur hættu eða fóru í tímabundin leyfi. Nú er sviðið hins vegar sagt fullmannað og auk þess hafi verið unnið að því að styrkja það á fleiri sviðum.

Búið sé að þróa skráningarkerfið LÖKE betur þannig að það nýtist ákærusviðinu betur. Starfsmenn þess geti nú haft fulla yfirsýn yfir öll mál, stöðu þeirra, hvar þau eru í ferlinu, hversu lengi þau hafa verið til meðferðar auk fleiri þátta.

Elsta málið, sem bíður ákvörðunar, er átta ára gamalt en gagna er beðið í því máli.