Sýslumaðurinn á Vesturlandi, ríkisskattstjóri, Hvalfjarðarsveit og VÍS hafa farið fram á að fjórar eignir fjölmiðlamannsins Björns Inga Hrafnssonar verði seldar nauðungarsölu.
Eignirnar fjórar eru allar í Hvalfirði en um er að ræða jarðirnar Másstaði 2-5 en kröfur gerðarbeiðenda nema um 40 milljónum króna. Þetta kemur fram í Lögbirtingablaðinu og Viðskiptablaðið greindi fyrst frá.
Þetta er ekki í fyrsta sinn á árinu sem farið er fram á nauðungarsölu á eignum Björns. Sýslumaðurinn á Vesturlandi auglýsti nauðungaruppboð á eignum Björns að Másstöðum í janúar á þessu ári. Þá var samtímis farið fram á gjaldþrot eiginkonu hans, Kolfinnu Von Arnardóttur. Gerðarbeiðendur í janúar voru Tollstjóri, Landsbankinn, Hvalfjarðarsveit, VÍS og sýslumaðurinn á Vesturlandi.
Fjárnám var gert í eignunum í desember 2017 að beiðni sýslumannsins á Vesturlandi vegna 664 þúsund króna kröfu.
Björn Ingi er ritstjóri Viljans og fyrrverandi borgarfulltrúi í Reykjavík. Björn Ingi átti áður félögin DV ehf., Pressuna ehf. og Vefpressuna ehf. sem öll eru gjaldþrota. Hann var til rannsóknar vegna gruns um brot gegn skattalögum á árunum 2014-2017. Í tilefni af þeirri rannsókn voru eignir hans kyrrsettar. Skattrannsóknarstjóri ákvað svo fyrr á þessu ári að ekki væri tilefni til að aðhafast frekar í málinu.
Ef Birni Inga tekst ekki að semja við gerðarbeiðendur þá verður beiðni um nauðungarsölu tekin fyrir þann 22. ágúst næstkomandi.
