Rétt upp úr klukkan þrjú í dag voru björgunarsveitir á Suðurlandi kallaðar út vegna göngumanns á gönguleiðinni yfir Fimmvörðuháls, en maðurinn er slasaður á fæti. Hann er staddur ofarlega á Morinsheiði við Heljarkamb og hjá honum er samferðafólk. Björgunarsveitafólk er nú á leiðinni upp Fimmvörðuhálsinn til að huga að manninum. Mögulega þarf að bera hann niður gönguleiðina eða upp á hálsinn til móts við sexhjól. Aðstæður til burðar á sjúklingum á þessum slóðum geta verið erfiðar þar sem gönguleiðin liggur um kletta og bratta hryggi.
Þetta kemur fram í tilkynningu frá Landsbjörgu. Fréttin verður uppfærð ef frekari tíðindi berast.
Uppfært kl. 18: Maðurinn fluttur með þyrlu
Nýja þyrla Landhelgisgæslunnar TF-GRÓ fór í sitt fyrsta útkall í dag þegar hún sótti á Fimmvörðuháls, mann sem var meiddur á fæti. Maðurinn er að sögn ekki hættulega slasaður, en átti erfitt með gang.