Albert Ísleifsson verður borinn til grafar klukkan 13:00 í dag frá Selfosskirkju. Albert féll fyrir fíkn sinni þriðjudaginn 9. júlí en móðir hans og Ragnar Erling Hermannsson vilja nota sögu Alberts til að vekja athygli á stöðu þeirra sem glíma við fíknivanda og andleg veikindi í íslensku samfélagi í dag, og stuðla að úrbótum.
Fyrr í vikunni var greint frá því að Ragnar ætli að stofna nýjan stjórnmálaflokk núna um helgina sem verður með það að markmiði að breyta því kerfi sem ítrekað hefur brugðist einstaklingum með fíknivanda og þeim er glíma við andlega kvilla.
Ragnar hvetur áhugasama til að mæta í útförina með mynd af föllnum ástvinum.„Gera smá sameiningargjörning til að sýna hversju gríðarlega miklu máli þetta skiptir, málefnið sem ekkert annað er mikilvægara en í dag. Fólk er að deyja úr þessum grimma sjúkdómi. […] og ef þið treystið ykkur til að koma með myndir af föllnum ástvinum þá þætti okkur voðalega vænt um það“
„Við skiptum máli. Þetta skiptir öllu máli núna og ekkert annað á að vera í forgangi en að gera eitthvað í þessum málum. Sameinuð þá getum við þetta. Ég trúi því og ég finn fyrir því að með þessu munum við stíga fyrsta skrefið í því að sýna fram á hversu mikilvægt þetta er. Við ætlum að sýna þessu áhuga og við ætlum að taka þetta í okkar eigin hendur.“
