Um níuleytið í gærkvöldi hafði lögreglan á höfuðborgarsvæðinu afskipti af ökumanni í Mosfellsbæ sem grunaður var um akstur bifreiðar undir áhrifum fíkniefna. Læknir kom á lögreglustöð og mat ökumanninn óhæfan til aksturs. Í bifreiðinni með ökumanni voru þrjú börn, á aldrinum ellefu til tólf ára. Barnavernd var kölluð til við afgreiðslu málsins.
Þetta kemur fram í dagbók lögreglu, ásamt þessu:
Ofurölvi maður handtekinn í hverfi 101 á fjórða tímanum í nótt. Lögregla ítrekað búin að hafa afskipti af manninum, vekja hann og vísa honum í burt en gekk ekki. Maðurinn var handtekinn og vistaður í fangageymslu lögreglu meðan ástand batnar.
Bifreið var stöðvuð í hverfi 108 á svipuðum tíma. Ökumaðurinn sem er aðeins 17 ára er grunaður um akstur bifreiðar undir áhrifum fíkniefna. Málið afgreitt með aðkomu móður og tilkynningu til Barnaverndar.
Tilkynnt var um umferðarslys í Höfðahverfinu þar sem maður á vespu ekur útaf og á staur. Áverkar á höfði. Fluttur með sjúkrabifreið á Slysadeild. Maðurinn er grunaður um ölvun á reiðhjóli.
Bifreið var stöðvuð í hverfi 110. Ökumaðurinn er grunaður um akstur bifreiðar undir áhrifum fíkniefna, vörslu fíkniefna og brot á vopnalögum. Ástand bifreiðarinnar var áfátt og voru skráningarnúmer fjarlægð.