Belgísku hjónin og synir þeirra, sem leitað var að við Kjalfell í gærkvöldi, eru fundin heil á húfi. Frímann Birgir Baldursson, varðstjóri hjá lögreglunni á Selfossi staðfesti fréttinar, en tugir björgunarsveitafólks í Árnessýslu hófu leit að þeim um hálftíuleytið í gær. Hjónin urðu viðskila við göngufélaga sína á Kili síðdegis í dag og villtust langt af leið.
Hjónin voru á fimmtugsaldri og lögðu af stað í göngu um tvöleytið frá Gíslaskála. Á fimmta tímanum hafði ekkert heyrst á fólkinu og fóru samferðamenn þeirra að hafa áhyggjur og óskuðu eftir aðstoð. Fyrstu hópar björgunarsveita lögðu af stað á um hálf tíu leytið til að hefja leit. Lagskýjað er á svæðinu og hiti er undir tíu gráðum.
Björgunarsveitir notuðust við hljóð- og ljósmerki, það er bláu ljósin á björgunartækjum, til þess að fólkið ætti auðveldara með sjá farartækin á ferð. Það bar árangur og fundust þau skömmu fyrir klukkan eitt.
Að sögn Frímanns, sem stjórnaði leitaraðgerðum Landsbjargar, var fólkið kalt og skelkað, en að öðru leyti í ágætu standi og fegið að sjá bjargvætti sína.