Jóna Elísabet Ottesen, framleiðandi og skipuleggjandi, slasaðist alvarlega í umferðarslysi á laugardag, og liggur nú á gjörgæslu, þar sem henni er haldið sofandi. Fyrst eftir slysið var hún með fulla meðvitund og vel áttuð, en ákvörðun var tekin um að setja hana í öndunarvél og halda sofandi á meðan bólgur hjaðna.
Jóna hlaut mænuskaða við slysið en fyrir mikla mildi slapp fimm ára dóttir hennar, sem var með henni í bílnum, með aðeins nokkrar skrámur. Ása Ottesen, systir hennar, segir í færslu á Facebook að nú sé stórt verkefni fram undan hjá fjölskyldunni, en ljóst er að Jóna mun þurfa mikla endurhæfingu vegna mænuskaðans.
„Við erum öll staðráðin í að tækla það með jákvæðum baráttuhug í anda Jónu. Hún er nefnilega algjör nagli, ef þið vissuð það ekki nú þegar.“
Ása segir að eftir slysið hafi margir sent skilaboð og baráttukveðjur og þykir fjölskyldunni afar vænt um það.
„Eftir slysið höfum við fjölskyldan fengið óendanlega mikið af skilaboðum, símtölum og baráttukveðjum úr öllum áttum, enda þykir öllum vænt um Jónu sem henni hafa kynnst. Við getum ekki lýst því hvað það hjálpar okkur mikið og hvetur okkur áfram.“
Margir sem höfðu samband lýstu yfir vilja til að styrkja fjölskylduna á þessum erfiða tíma, og því ruku vinkonur Ásu og Jónu til og stofnuðu styrktarreikning
„528-14-401998, kt. 701111-1410.
Allt sem fer inn á þann reikning fer beinustu leið í að styrkja Jónu og byggja hana upp á ný, þegar sá tími kemur.
Ást og kærleikur til ykkar“