Héraðsdómur Norðurlands eystra dæmdi mann í sex ára fangelsi í gær fyrir tilraun til manndráps. Maðurinn var fundinn sekur um að hafa veitt manni mörg lífshættuleg stungusár í bæði andlit og líkama. Árásin átti sér stað í miðbæ Akureyrar í nóvember í fyrra. Fréttablaðið greinir frá þessu en dómurinn hefur ekki verið birtur.
Maðurinn var dæmdur til að greiða brotaþolanum 1.200.000 í miskabætur og allan sakarkostnað málsins, vel á sjöttu milljón króna.
Ákærði neitaði sök og kvaðst hafa beitt nauðvörn. Í dómsorði segir hins vegar að ekki sé hægt að fallast á það þó að sá sem varð fyrir árásinni hafi ráðist að ákærða að fyrra bragði. Árásarmaðurinn og brotaþolinn eru ekki sammála um hvor hafi átt upptökin. Í dómsorði segir að árásin hafi verið lífshættuleg og valdið brotaþola varanlegun andlitsskaða.