„Við höfum einfaldlega ekki tök á að vera með opið fyrir matarúthlutanir í sumar. Til þess þyrftum við meira fé,“ svo er haft eftir Ásgerði Jónu Flosadóttur, formanni Fjölskylduhjálpar Íslands, í Morgunblaðinu í dag.
Nú í sumar mun Fjölskylduhjálp Íslands, í fyrsta sinn í sögu samtakanna, loka fyrir úthlutanir fram til september.
Ásgerður segir að í mánuði veiti samtökin hátt í 900 úthlutanir í mánuði hverjum, en aðstoðin er meðal annars fjármögnuð með framlögum, söfnunum og flóamörkuðum. Það er ekki einungis mataraðstoð sem samtökin veita heldur hafa þau einnig til að mynda aðstoðað skjólstæðinga við lyfjakaup. Ásgerður sagði við Morgunblaðið að í ár hefðu margir spurst fyrir um aðstoð við sumarnámskeið barna, en samtökin hafa ekki veitt slíka aðstoð.
Þeir sem leita til samtaka á borð við Fjölskylduhjálp gera slíkt, að sögn Ásgerðar, ekki að gamni sínu.
Nú eru grunnskólabörn landsins farin í sumarfrí þar til í ágústlok. Tekjulágar fjölskyldur eru því í erfiðri stöðu. Foreldrar hafa takmörkuð tök á því að fara í sumarfrí en einhver verður að gæta barnanna. Hjá sveitarfélögum, íþróttafélögum og fleirum eru ýmis sumarnámskeið í boði. Flest þeirra standa þó aðeins yfir í um viku og geta verið ansi kostnaðarsöm fyrir foreldra.
Foreldrum sem þurfa aðstoð við matarkaup eða sumarnámskeið er bent á Hjálparstarf kirkjunnar, en hjá þeim verður opið í sumar.
