Það er engum ofsögum sagt að hin 24 ára Taylor Demonbreun sé mikil ævintýramanneskja. Á undanförnum átján mánuðum hefur Taylor ferðast um allan heim – í bókstaflegri merkingu – og heimsótt öll 193 fullvalda ríki heimsins.
Taylor er búsett í Flórída en eftir útskrift frá Vanderbilt-háskólanum árið 2017 skellti hún sér í heimsreisu. Og þann 10. Júní síðastliðinn fékk hún viðurkenningu frá heimsmetabók Guinness. Varð hún sú yngsta til að heimsækja öll löndin og sú fljótasta. Til viðbótar við þessi 193 ríki heimsótti hún Vatíkanið og Taipei.
Í viðtali við New York Post segist hún ávallt hafa reynt að finna ódýrustu flugfargjöldin. Áætlar hún að ferðalagið hafi kostað 70 þúsund Bandaríkjadali, 8,7 milljónir króna.
Það er kannski ánægjulegt fyrir okkur Íslendinga að vita til þess að Taylor talar fallega um Ísland, segir raunar að Ísland hafi verið annað af tveimur ríkjum sem virkilega stóðu upp úr. „Ísland var stórfenglegt – og Singapúr líka þar sem mig hafði alltaf langað að ferðast þangað,“ segir hún.
Þeir sem hafa áhuga á að leika sama leik og Taylor og skella sér í heimsreisu þurfa að hafa nokkur atriði í huga, segir hún. Hún segir að mikilvægt sé að hafa alla pappírsvinnu á hreinu og gæta þess að hafa vegabréfsáritun þegar þess þarf. Hún segir að næsta verkefni sé hugsanlega að skrifa bók um þetta mikla ævintýri.
Hægt er að lesa um upplifun hennar af Íslandi á bloggsíðu hennar.