AFL starfsgreinafélag hefur fengið ábendingar um að eigendur og yfirmenn í ferðaþjónustu taki í einhverjum tilvikum allt þjórfé sem gestir skilja eftir. Þetta kemur fram á vefsíðu félagsins.
„Starfsmaður á litlu hóteli sagði okkur að í fyrra hefðu yfirmenn tekið allt þjórfé og sagt að fyrir það yrði staðið fyrir starfsmannahátíð. Engin slík hátíð hefði verið haldin. Í ár væri allt þjórfé tekið en engar skýringar gefnar.“
Samkvæmt lögmönnum Afls er erfitt að grípa til aðgerða gegn slíku þar sem á Íslandi sé ekki mikil hefð fyrir þjórfé. Yfirmenn geti borið því við að peningurinn eigi að renna til þeirra þar sem engin önnur fyrirmæli um ráðstöfun umframgreiðslunnar liggi fyrir.
AFL segir þetta ómerkilega framkomu. Viðmót og vinna starfsfólksins sé ástæða þess að þjórfé er skilið eftir og sé það vilji viðskiptavina að þjórfé renni til þeirra tilteknu starfsmanna sem veittu þeim þjónustuna.
„Í einhverjum tilfellum er starfsfólki sem kvartar – tilkynnt að það séu nægir til að taka störfin þannig að ef fólk ekki er ánægt geti það bara farið. Yfirmenn sem stela þessum aukagreiðslum sem klárlega voru ekki ætlaðar þeim – eru litlar sálir.“