Óhætt er að segja að rekstur World Class gangi ágætlega um þessar mundir og til marks um það þrefaldaðist hagnaðurinn árið 2018 frá árinu 2017.
Fjallað er um þetta í Markaðnum í Fréttablaðinu í dag.
Þar kemur fram að Laugar ehf., fyrirtækið sem heldur utan um rekstur líkamsræktarstöðva World Class, hafi hagnast um 530 milljónir króna árið 2018. Árið 2017 nam hagnaðurinn 179 milljónum króna og þrefaldaðist hann því á milli ára.
„Tekjur félagsins jukust um tæpan hálfan milljarð á milli ára. Þær fóru úr 2.760 milljónum króna á árinu 2017 upp í 3.246 milljónir á síðasta ári,“ segir í fréttinni og því bætt við að hjónin Björn Leifsson og Hafdís Jónsdóttir eigi hvort 36,6 prósent í félaginu. Sigurðr Leifsson á 26,8 prósent.