Kristján Jóhannsson óperusöngvari talar nokkuð tæpitungulaust í viðtali við Sigurlaugu Margréti Jónasdóttir í þættinum Segðu mér á Rás 1. Þar viðurkennir hann fúslega að vera karlremba en bætir því þó við að það sé konum að kenna.

Kristján segist vera tuðari og af gamla skólanum. „Ég er nú af svokölluðum gamla skóla og hann er bara langbesti skólinn. Það er alltaf þetta fjandans væl. Þá tuða ég. Það er kominn smá kall í mann. Karlremba er nauðsynleg,“ segir Kristján.

Í viðtalinu er Kristján spurður hvort hann hafi smitast af ítölsku karlrembunni, en þar hefur hann búið í nærri tíu ár. „Já ég er með karlrembu og hún er ykkur konum að kenna. Hún er mæðrum að kenna,“ segir hann. Hann segir ítalska karlmenn vera sjálfhverfa vælara.

„Þetta er þeim í blóð boðið frá mæðrum. Þessar mæður eru vitlausar þegar fyrsti sonurinn fæðist og þær láta þannig fram að fimmtugu. Það er í eðli mæðra að elska syni. Það er líka í eðli feðra að elska dæturnar meira. Það geri ég geri það allavega.“

Viðtalið má hlusta í heild sinni hér.