Gunnar Smári Egilsson, fyrrverandi fjölmiðlamaður og stofnandi Sósíalistaflokksins, kveðst vera sammála Sigmundi Davíð Gunnlaugssyni, formanni Miðflokksins, um að lækka þurfi laun ráðherra.

Sigmundur lagði fram tillögu á þingi í gær um að laun ráðherra myndu lækka talsvert. Sagði hann að tilgangurinn væri að jafna kjör og draga úr launamun þingmanna annars vegar og ráðherra hins vegar. Eins og Fréttablaðið bendir á í dag hefðu laun ráðherra, forsætisráðherra þar á meðal, orðið lægri en launin sem Sigmundur og aðrir formenn stjórnmálaflokka í stjórnarandstöðu fá.

Ef tillagan hefði verið samþykkt hefðu laun forsætisráðherra farið úr 2.021 þúsund krónumá mánuð í 1.596 þúsund. Laun annarra ráðherra hefðu farið úr 1.826 þúsund krónum í 1.431 þúsund krónur. Tillaga Sigmundar var felld með 35 atkvæðum gegn 9. Fimm þingmenn sátu hjá.

„Auðvitað hefur Sigmundur rétt fyrir sér; laun íslenskra ráðherra eru út úr öllu korti. Fram hefur komið að íslenskir ráðherrar séu með hæst launuðu stjórnmálafólki í heiminum ásamt íslenskum borgar- og bæjarstjórum,“ segir Gunnar Smári og bætir við að pólitík eigi að vera fyrir fólk sem vill láta gott af sér leiða. Ekki einstaklinga sem sækist eftir hærri launum en það getur fengið annars staðar.

„Horfið yfir ríkisstjórnina og svarið eftirfarandi: Væri þetta fólk einhvers staðar með um og yfir tvær milljónir á mánuði, alla risnu greidda og bíl og bílstjóra að auki? Laun ráðherra og bæjarstjóra eiga að vera á pari við laun skólastjóra í grunnskóla og laun þingmanna á borð við yfirkennara. Allt umfram það er þjófnaður elítu sem kemst upp með að moka undir rassinn á sjálfum sér, allt þar til almenningur rís upp og varpar þessari byrði af sér.“