Oddný Arnarsdóttir og Hildur Lilliendahl Viggósdóttir voru í morgun dæmdar í Héraðsdómi Reykjavíkur til greiðslu miskabóta vegna ummæla sem þær létu falla á samfélagsmiðlum um tvo menn tengda meintu nauðgunarmáli í Hlíðahverfi haustið 2015. Oddný var dæmd til að greiða hvorum manni 220.000 krónur og Hildur 150.000 krónur. Morgunblaðið greindi frá.
Hlíðamálið vakti gífurlega athygli á sínum tíma en Fréttablaðið hélt því fram í forsíðufrétt af málinu að íbúð mannanna tveggja hefði verið útbúin til nauðgana. Mennirnir voru hins vegar ekki dæmdir í gæsluvarðhald og af þeirri ástæðu reis upp mikil mótmælaalda. Oddný og Hildur skipulögðu þá mótmæli fyrir utan lögreglustöðina á Hlemmi. Fréttakona Stöðvar 2 sem lýsti mótmælunum sagði meðal annars: „Byltingin er hafin“.
Rannsókn á hinum meintu brotum leiddi ekki til ákæru og felldi ríkissaksóknari það niður í júní 2016.
Mennirnir voru ekki nafngreindir í fjölmiðlum en voru hins vegar bæði nafngreindir og birtar myndir af þeim á samfélagsmiðlum.