Lögreglan hafði nóg um verkefni í nótt, en alls voru skráð 86 mál frá því klukkan 17:00 í gærkvöldi til 05:00 í morgun.
Lögregla hafði afskipti af manni í annarlegu ástandi að skemma tré og staura við grunnskóla í hverfi 108. Verður maðurinn kærður fyrir eignaspjöll og brot á lögreglusamþykkt Reykjavíkurborgar.
Afskipti voru höfð af konu klukkan að ganga níu í gærkvöldi en hún hafði ekki borgað fyrir leigubíl. Konan verður kærð fyrir fjársvik.
Klukkan að ganga fjögur í nótt var kona handtekin í miðbænum grunum um líkamsárás gegn dyraverði. Konan neitaði að segja til nafns eða leggja fram skilríki og var vistuð í fangageymslu.
Lögreglan var með umferðareftirlit á Hafnarfjarðarvegi í nótt þar sem ástand ökumanna og ökuréttindi voru könnuð. Afskipti voru höfð af 120 ökumönnum og þrír af þeim handteknir grunaðir um ölvunarakstur.
Lögreglan var einnig við hraðamælingar á Suðurlandsvegi í gærkvöldi. Fjórtán ökumenn voru stöðvaðir vegna hraðaksturs á 2 klukkustundum.
Nokkrir voru handteknir grunaðir um ölvunarakstur eða akstur undir áhrifum vímuefna.
Lögregla þurfti einnig að sinna mörgum kvörtunum um tónlistarhávaða í heimahúsum, framkvæmdahávaða á vinnustöðum og frá skemmtistöðum.