Gísli Grétar Þórarinsson var á dögunum dæmdur fyrir fólskulega árás á konu sem hann virðist ekkert hafa þekkt fyrir. Samkvæmt dómi réðst hann á konu við Olís að Sundabraut, er konan sat í bíl sínum og átti sér einskis ills von. Hann reif í hana, sneri upp á buff sem hún hafði um háls sinn, ýtti með þumalfingri á háls hennar og hristi.
Athygli vekur að Gísli Grétar fær mjög vægan dóm fyrir þetta, 30 daga skilorðsbundið fangelsi. Í dómi segir að samkvæmt framlögðu sakavottorði þá hafi hann ekki verið dæmdur til refsingar áður. Rétt er þó að geta þess að einungis einn maður heitir þessu nafni á Íslandi og var sá dæmdur í fjögurra ára fangelsi árið 1990 fyrir að nauðga konu grímuklæddur og vopnaður hnífi. Það mál er þó um þrjátíu ára gamalt og er væntanlega farið af sakavottorði.
Hvað sem því líður þá var Gísli Grétar nú dæmdur fyrir að ráðast á konu á Olís. Samkvæmt dómi þá virðist árásin hafa sprottið upp úr deilu á planinu. Atvikinu er lýst svo í frumskýrslu lögreglu:
„Hún kvaðst hafa verið nýbúin að setja olíu á bifreið sem hún ók og verið að aka á brott frá dælunum og þurft þá að aka bifreiðinni nokkrum sinnum aftur á bak og áfram þar sem bifreiðin sé löng og aðstæður þröngar. Þegar hún ætlaði að aka bifreiðinni aftur á bak hafi ákærði verið búinn að stilla sinni bifreið upp fyrir aftan bifreið hennar þannig að hún gat ekki bakkað. Hún hafi því flautað og gefið honum merki um að bakka en hann ekki sinnt því. Þá hafi hún farið út úr bifreiðinni og gefið honum merki um að færa sig.“
Þegar hún settist aftur í bíl sinn þá réðst Gísli Grétar á hana. Segir í dómi:
„Þegar hún hafi verið að setjast aftur inn í bifreið sína hafi ákærði ráðist á hana, gripið um kraga á jakka sem hún var í og hert verulega að þannig að hún hafi átt erfitt með andardrátt. Síðan hafi hann þrýst henni inn í bifreið hennar og öskrað á hana og hrist hana þannig að hönd hennar hafi ítrekað slegist utan í bifreiðina. Síðan hafi ákærði gengið til baka og ekið á brott.“
Gísli sagði við yfirheyrslu hjá lögreglu að konan hafi verið með stæla og hann því ýtt við henni. Segir í dómi:
„Ákærði kvaðst hafa verið búinn að leggja bifreið sinni við bensínstöðina þegar bifreið brotaþola, sem var mjög stór, var bakkað. Hann hafi setið í bifreið sinni og flautað en dúndrandi tónlist hafi borist frá hinni bifreiðinni. Sú bifreið hefði stöðvast en farið svo aftur af stað og hefði hann slegið í bifreiðina til að stoppa hana og farið að hurð bifreiðarinnar bílstjóramegin. Konan sem var ökumaður hafi þá sagt „hvaða helvítis fokk, ég nenni þessu ekki, ég er búin að vera vakandi í tvo sólarhringa …“. Hún hafi farið út úr bifreiðinni og hann þá ýtt við henni en kvaðst ekki muna hvað hann hafi sagt við hana. Hún hafi verið með „attitude“ og það hafi fokið í hann og hann ýtt á hana. Þá hafi hann einnig haldið, líklega fast, í jakka hennar, að því er hann haldi, þar sem hann stóð í dyragættinni.“
Dómari taldi sannað, meðal annars vegna myndbandsupptöku, að Gísli hafi ráðist á konuna. Dómari taldi að árasin hafi verið tilefnislaus og fólskuleg. Hann var dæmdur í 30 daga skilorðsbundið fangelsi og að greiða konunni um 160 þúsund í skaða-og miskabætur.
