Í þriðjungi sýna, sem Matvælastofnun og atvinnuvega og nýsköpunarráðuneytið í samvinnu við heilbrigðiseftirlit sveitarfélaga stóðu fyrir töku á úr íslensku lambakjöti, fundust gen af E.coli bakteríunni. Í sextán prósentum tilfellanna fannst lifandi baktería sem bar eiturefni. Sóttvarnarlæknir segir niðurstöðuna sýna að umræðan hafi verið á villigötum.

Fréttablaðið skýrir frá þessu í dag. Sýnin voru tekin frá því í mars á síðasta ári þar til í desember. Um 600 sýni voru tekin af nautakjöti, lambakjöti, svínakjöti og kjúklingum, bæði innlendu og erlendu kjöti. Skimað var fyrir salmonellu, kampýlóbakter og shigatoxinmyndandi E.coli en það er afbrigði af E.coli og getur myndað eiturefnið shitatoxín.

148 sýni voru tekin af lambakjöti og fundust gen af STEC-afbrigði í þriðjungi þeirra og þar af voru lifandi bakteríur, sem báru eiturefnið, í 16 prósentum sýnanna. Í nautakjöti fundust gen í 17 sýnum af 148 og voru lifandi bakteríur í átta sýnum.

Fréttablaðið hefur eftir Dóru S. Gunnarsdóttur, forstöðumanni neytendaverndar hjá MAST, að þetta sé tiltölulega há tíðni og ástæða sé til að vakta stöðuna.

Þórólfur Guðnason, sóttvarnarlæknir, segir þetta sláandi niðurstöður sem sýni að umræðan hafi verið á villigötum.

„Þetta sýnir bara það að þetta er ekki eins og umræðan hefur verið um íslenska framleiðslu samanborið við þá erlendu. Sjúkdómsvaldandi bakteríur og sýklalyfjaónæmar bakteríur finnast líka í íslensku kjöti. Við erum ekki bara að tala um útlensk matvæli.”

Hefur Fréttablaðið eftir honum.