Í dag fer fram málflutningur í málaferlum Kristins Sigurjónssonar gegn Háskólanum í Reykjavík en hann var rekinn úr starfi sínu sem lektor við skólann eftir að DV greindi frá ummælum hans sem mörgum þótti einkennast af kvenhatri. Kristinn krefst þess að skólinn verði dæmdur til að greiða honum um 57 milljónir króna
Rektor skólans, Ari Kristinn Jónsson, bar vitni fyrir dómi í dag og sagði engan starfsmann nokkurn tímann greint frá því að þeir teldu sig njóta stöðu opinbers starfsmanns.
Háskólinn í Reykjavík hefði ekki átt neitt frumkvæði að þeirri fjölmiðlaumfjöllun sem um málið varð, skólinn hefði gjarnan viljað taka á þessu máli svo best kæmi út fyrir báða aðila.
„Það kom okkur á óvart þegar þetta fór af stað í fjölmiðlum og við veittum engar upplýsingar til fjölmiðla fyrr en mjög seint.“
Kristni hefðu verið veittir tveir valkostir, að vera sagt upp störfum, eða gera starfslokasamning við skólann.
Þeir hagsmunir sem Háskóli Reykjavíkur hugsar um fyrst og fremst og ástæða þess að tekin var ákvörðun um að Kristinn skyldi ljúka störfum við skólann, sé líðan nemenda og starfsmanna í skólanum. Þrátt fyrir akademískt frelsi starfsmanna og tjáningarfrelsi þá séu þó takmörk fyrir þeim ummælum sem þeir geti látið frá sér.
„Við fundum það alveg að konur á vinnustaðnum margar tóku þetta mjög alvarlega“
Í skýrslutöku rektors kom fram að athygli hans hefði verið vakin á málinu í kjölfar umfjöllunar í DV sem starfsmaður skólans benti honum á. Í kjölfarið hefði skólinn gefið frá sér yfirlýsingu um að málið væri komið í viðeigandi ferli.
„Það sem gerir það að verkum að það þarf að segja frá því að málið sé í ferli, sem við gerum vanalega ekki, er að þetta var orðin opinber umræða.“
Sömuleiðis tók rektor fram að til hans hefðu borist kvartanir nemenda um að Kristinn hefði viðhaft klúra brandara. En rektor hafði hins vegar ekki lagt fram neinar sannanir þess efnis.