Lögreglan á höfuðborgarsvæðinu fékk tilkynningu um innbrot í bílskúr í Breiðholti klukkan hálf þrjú í nótt. Þar hafði verið þvingaður upp gluggi og farið inn.
Sá sem tilkynnti manninn til lögreglu reyndi að stöðva för hans en maðurinn dró þá upp hníf og ógnaði viðkomandi. Ekki kemur fram hvort húsráðandi eða vegfarandi sem átti leið um hafi tilkynnt manninn.
Að sögn lögreglu komst maðurinn í burtu á vespu og fannst hann ekki þrátt fyrir eftirgrennslan lögreglu.
Lögregla sinnti fleiri verkefnum í gærkvöldi og í nótt. Þannig voru þrír menn handteknir í vesturbænum á áttunda tímanum í gærkvöldi vegna gruns um líkamsárás og brot á vopnalögum. Þeir voru vistaðir í fangageymslu lögreglu vegna rannsóknar málsins.
Þá var maður í annarlegu ástandi handtekinn í Kópavogi rétt fyrir klukkan þrjú í nótt. Ítrekað var búið að tilkynna manninn sem fór inn í ólæstar bifreiðar. Hann var vistaður í fangageymslu.
Þá stöðvaði lögregla ökumenn sem grunaðir eru um akstur undir áhrifum fíkniefna. Einn var svo stöðvðaur fyrir hraðakstur á Reykjanesbraut, en um var að ræða bifhjólamann sem mældist á 119 kílómetra hraða þar sem hámarkshraði er 80 kílómetrar.