Lögreglan á höfuðborgarsvæðinu fékk tilkynningu um meðvitundarlausan mann í Elliðaárdalnum, við stífluna, rétt eftir klukkan sjö í gærkvöldi.

Í dagbók lögreglu kemur fram að sjúkrabíll og lögregla hafi farið á vettvang, en maðurinn reyndist vera ofurölvi eða í vímu. Maðurinn var skoðaður af sjúkraflutningamönnum en var handtekinn eftir það og vistaður í fangaklefa sökum ástands síns.

Lögregla sinnti fleiri verkefnum í gærkvöldi og í nótt. Þannig voru nokkrir ökumenn teknir úr umferð, ýmist vegna gruns um ölvunar- eða fíkniefnaakstur. Þá voru sumir réttindalausir við aksturinn.

Þá handtóku lögreglumenn í Hafnarfirði konu á öðrum tímanum í nótt. Konan, sem var í annarlegu ástandi, stóð við bifreið í innkeyrslu að bílageymslu. Hún var færð í fangaklefa vegna ástands síns.