„Búast má við að hiti fari yfir 20 gráður á morgun og á miðvikudag, hlýjast í innsveitum norðanlands á morgun, en sunnanlands á miðvikudag. Í lok vikunnar eru mestar líkur á að við förum aftur í endurtekið efni, norðaustanátt með dálítilli vætu norðaustanlands, en björtu veðri suðvestanlands og heldur kólnandi veðri.“ Þetta stendur í hugleiðingum veðurfræðings á vef Veðurstofu Íslands, en útlit er fyrir að veðrið leiki við landsmenn fyrrihluta vikunnar, þó að það gráni eilítið seinni partinn.
Eins og áður segir getur hiti farið yfir tuttugu gráður á morgun og á miðvikudag mun hitinn á landinu vera á milli tólf og 22 stig, hlýjast á Suðurlandi. Á fimmtudag verður bjart með köflum á Norðurlandi en skýjað á Norð-austur og Austurlandi ásamt dálítilli rigningu framan af degi. Á austanverðu landinu fer hitinn upp í tólf stig en átján stig víða annars staðar.
Skýjað með köflum og þurrt verður á föstudag og laugardag og þá má búast við að hiti fari upp í átján stig, hlýjast suðvestanlands. Á sunnudag er hins vegar útlit fyrir að verði skýjað og lítilsháttar rigning víða um landið.