Íslensku sjómennirnir, sem skáru sporð af hákarli og birtu af því myndband á samfélagsmiðlum, hafa vakið athygli út fyrir landsteinana. Norski fjölmiðillinn VG birti myndbandið og greindi frá því að sjómennirnir þrír hefðu verið reknir. VG ræddi við sjávarlíffræðinginn Fredrik Myhre sem sagði myndbandið hryggja hann mikið, en það sé mikilvægt að vekja athygli á málinu, öðrum víti til varnaðar.
„Ég verð alveg ótrúlega hryggur þegar ég sé svona heimskulegar meðhöndlun. Hér má sjá sjómenn sem hafa fengið hákarl á línuna hjá sér og í stað þess að frelsa hann og sleppa honum aftur í hafið þar sem hann gæti lifað í nokkur ár til viðbótar, þá skera þeir af honum sporðinn og sleppa honum út í vísan dauðann. Þetta er gífurlega sársaukafullt fyrir fiskinn, svo ekki sé minnst á að þetta er meiriháttar umhverfisbrot og dýraníð. Það er ótrúlega mikilvægt að vekja athygli á svona málum. Ef fólk veit ekki af svona hátterni þá getum við ekki þrýst á þá sem stunda svona heimskulegt athæfi.“
VG tók fram að myndbandið hefði sprengt upp samfélagsmiðla hér á landi og að nú sé til skoðunar hjá íslenskum yfirvöldum að beita sjómennina þrjá viðurlögum vegna athæfisins.
„Íslensk yfirvöld íhuga núna hvort tilkynna eigi málið til lögreglu eða hvort viðkomandi menn verði kærðir. Samkvæmt Vísi hafa sjómennirnir ekki tjáð sig um myndbandið eftir birtingu þess.“
Nú þegar þessi frétt er skrifuð hafa tæplega 50 þúsund manns horft á frétt VG.