Sáttaumleitanir á milli stjórnvalda og þeirra sem voru sýknaðir í Guðmundar- og Geirfinnsmálunum eru að sigla í strand. Guðjón Skarphéðinsson hafnaði bótatilboði sáttanefndar ríkisstjórnarinnar og því virðast viðræðurnar vera að sigla í strand en mikil áhersla hefur verið lögð á að ná sáttum við alla þá sýknuðu og aðstandendur þeirra sem eru látnir og ljúka málinu án atbeina dómstóla.

Fréttablaðið skýrir frá þessu í dag. Segir blaðið að Guðjón hafi hafnað tilboði sáttanefndarinnar en hún hefur úr um 600 milljónum að spila. Guðjón hefur hins vegar gert kröfu upp á rúmlega 1.000 milljónir í miskabætur og um 400 milljónir í bætur fyrir missi atvinnutekna.

Blaðið segir að góður sáttatónn hafi verið í flestum og ágætlega hafi litið út með að sættir næðust þar til Guðjón hafnaði tilboði sáttanefndarinnar. Fréttablaðið segir að þetta hafi gjörbreytt stöðunni og nú eigi sáttanefndin aðeins eftir að skrifa bréf til forsætisráðherra og skila málinu af sér með því.

Haft er eftir Andra Árnasyni, settum ríkislögmanni í málinu, að enn eigi eftir að taka formlega afstöðu til kröfu Guðjóns en þar sem sáttanefnd hafi ekki fallist á hana sé líklegt að henni verði hafnað. Það stefnir því í að dómstólar ákveði bætur til þeirra sem sýknaðir voru og verða væntanlega nokkur dómsmál rekin vegna þess.