Undarleg uppákoma átti sér stað í gær á sýningu á leikritinu Sýningin sem klikkar, í Borgarleikhúsinu. RÚV greindi frá málinu.

Leikritið er gamanleikrit, eða farsi, og kipptu gestir sér því lítið upp við miðaldra par sem sat meðal áhorfenda, en hegðaði sér undarlega.

Svo virtist sem að parið væri áberandi ölvað og hegðuðu þau sér eftir því. Gestir sýningarinnar töldu að þetta væri hluti af sýningunni og höfðu upphaflega gaman af.

„Konan hélt á bjórglasi í óstöðugri hendi og hellti yfir sessunaut sinn á meðan karlinn sofnaði svefni hinna réttlátu við hliðina á henni.“

Eins og áður segir töldu gestir upphaflega að þetta væri viljaverk og hluti sýningarinnar. Enda sat parið utarlega á 14 bekk sem gæti þess vegna verið líklegur staður fyrir leikara til að vera með uppákomu.

„Gamnið fór hins vegar að kárna þegar karlinn rumskaði og kastaði upp. Þá fór að þyngjast brúnin á nærstöddum, en var samt allt kyrrt um hríð“

Það sem gerði útslagið var svo þegar parið gerðist heldur of djarft í ástaratlotunum. Þá reis leikhúsgestur sem sat fyrir aftan þau upp og náði í húsvörð.

Parinu var í kjölfarið vísað af sýningunni.