Þóra Arnórsdóttir, ritstjóri fréttaskýringarþáttarins Kveiks, er á leiðinni í launalaust leyfi. Rakel Þorbergsdóttir, fréttastjóri Ríkisútvarpsins, mun leysa hana af.
Þetta staðfesti Þóra í samtali við blaðamann. Þóra mun dvelja með fjölskyldu sinni á Ítalíu í leyfinu þar sem maður hennar, Svavar Halldórsson, er í meistaranámi. Aðspurð hvað hún ætlaði að taka sér fyrir hendur á Ítalíu svarar Þóra:
„Bara sem minnst. Ég ætla að koma þremur börnum í skóla á erlendu tungumáli, það er bara ærið verkefni er það ekki?“
Í samtali við fréttastofu Vísis segir Rakel Þorbergsdóttir að hún muni ekki taka að sér umsjón í Kveik heldur gegna ritstjórastöðu samhliða stöðu fréttastjóra.
Rakel segist spennt fyrir verkefninu en hún var ein af stofnendum Kveiks. „Og verð núna með meiri afskipti og það er bara spennandi.“