Átján ára piltur var færður á lögreglustöð skömmu eftir miðnætti í gærkvöldi eftir að hann var staðinn að ofsaakstri á Kringlumýrarbraut.

Í skeyti frá lögreglu kemur fram að bifreið piltsins hafi mælst á 177 kílómetra hraða en hámarkshraði á Kringlumýrarbraut er 80. Mál piltsins var afgreitt á lögreglustöðinni og var hann sviptur ökuréttindum til bráðabirgða. Samkvæmt sektarreikni á vef Umferðarstofu gæti ákæra og dómur beðið piltsins.

Venju samkvæmt hafði lögregla einnig afskipti af ökumönnum sem ýmist voru grunaðir um ölvun við akstur eða akstur undir áhrifum fíkniefna.

Þá var lögreglu kölluð í Smáralind um átta leytið í gærkvöldi vegna þriggja einstaklinga sem staðnir voru að hnupli á snyrtivörum úr verslun. Málið var afgreitt á vettvangi, að sögn lögreglu.