Lögreglan á höfuðborgarsvæðinu er með mál til rannsóknar sem varðar þjófnað á hóteli og ofbeldi sem starfsmaður þess varð fyrir í nótt.
Í dagbók lögreglu segir að tilkynnt hafi verið um þjófnað af hóteli í hverfi 105, sem er Hlíðahverfi. Þar vildi maður fá afgreitt áfengi en var synjað í ljósi þess að búið var að loka afgreiðslunni. Maðurinn tók til sinna ráða, fór sjálfur í kæli og tók þar áfengisflöskur.
Þegar afgreiðslustúlka reyndi að stöðva manninn þá hrinti hann henni í gólfið og hljóp út en missti við það farsímann sinn. Síðar kom vinur mannsins og ætlaði að sækja símann en sá þá lögreglu og hljóp út. Að sögn lögreglu er númer símans skráð og verður málið rannsakað.
Fleiri mál komu á borð lögreglu í gærkvöldi og í nótt. Um níuleytið í gærkvöldi var tilkynnt um innbrot í geymslu í fjölbýlishús í vesturbænum en þar var meðal annars stolið þremur ferðatöskum.
Þá var ofurölvi maður handtekinn í Seljahverfi rétt fyrir fjögur í nótt. Hann var vistaður í fangaklefa meðan ástand hans lagast.
Lögregla stöðvaði einnig ökumann í Hafnarfirði rétt fyrir klukkan eitt í nótt. Hann er grunaður um akstur undir áhrifum fíkniefna og akstur án ökuréttinda.
Loks var tilkynnt um umferðaróhapp á Vesturlandsvegi rétt fyrir klukkan þrjú í nótt. Þar hafði bifreið verið ekið á ljósastaur. Ökumaðurinn var fluttur með sjúkrabíl á slysadeild og kvartaði undan brjóstverk. Bifreiðin var flutt af vettvangi með Króki.