Guðni Th. Jóhannesson birti í gærkvöld hjartnæma og merkilega mynd af föður sínum Jóhannesi Sæmundssyni, sem lést langt um aldur fram, og með honum á myndinni eru bræðurnir tveir barnungir, Guðni sjálfur og Patrekur Jóhannesson, handboltagarpur og handboltaþjálfari. Tilefnið er fyrsti Íslandsmeistaratitill Selfoss í handbolta en liðið lagði Hauka í gærkvöld í úrslitarimmu um titilinn. Patrekur er þjálfari Selfyssinga en fyrir 40 árum hélt faðir þeirra heitinn handboltanámskeið á Selfossi.

Guðni skrifar:

„Ég óska karlaliði Selfoss í handbolta hjartanlega til hamingju með Íslandsmeistaratitilinn. Er ekki vanur að senda liðum slíkar kveðjur en veðja á að mér fyrirgefist undantekningin í þetta sinn – Patti bróðir á stóran þátt í þessum sigri. Haukar voru verðugur mótherji, stórveldi í íslenskum handbolta síðustu áratugi. Þeir mæta að venju sterkir til leiks á næsta tímabili.

Í báðum liðum eru flestir leikmenn á heimaslóðum, léku með sínu liði í yngri flokkum. Þetta er eflaust ein meginástæða þeirrar velgengni sem Haukar hafa notið og Selfyssingar núna, og má margt af því læra.

Á myndinni að neðan erum við eldri bræðurnir með föður okkar, Jóhannesi heitnum Sæmundssyni (yngsti bróðirinn Jóhannes var ekki kominn í heiminn þarna). Fyrir nær 40 árum stóð pabbi að handboltanámskeiði á Selfossi með fleirum og segjum bara að nú reki Patti smiðshöggið á uppbygginguna sem þá hófst! Aftur til hamingju, kæru Selfyssingar.“

Jóhannes Sæmundsson var þekktur íþróttafrömuður og starfaði meðal annars lengi sem íþróttakennari í M.R. þar sem hann var mjög vinsæll meðal nemenda. Í greinasafni Morgunblaðsins, í flokknum Merkir Íslendingar, segir um Jóhannes:

„Jóhannes lést langt um aldur fram árið 1983 eftir baráttu við krabbamein, aðeins 43 ára að aldri. Jóhannes var leikfimi- og íþróttakennari við Flensborg og Lækjarskóla í Hafnarfirði og við Hlíðaskóla í Reykjavík. Lengst af var hann þó íþróttakennari og félagsmálafulltrúi við Menntaskólann í Reykjavík þar sem hann starfaði frá 1967. Hann var fræðslustjóri ÍSÍ frá 1972 og til dauðadags, aðstoðaði við þjálfun landsliðanna í handknattleik og í körfuknattleik og átti þátt í að semja námsskrá í íþróttum fyrir grunnskóla.“