Fjórir Íslendingar voru settir í gæsluvarðhald 12. maí síðastliðinn fyrir stórfellt fíkniefnasmygl. Frá þessu er greint í fréttatíma Stöðvar 2. óljóst er á þessu stigi málsins hvaðan fíkniefnin, sem ætluð voru til sölu á íslenskum fíkniefnamarkaði, eiga uppruna sinn.
Talað er um að lagt hafi verið hald á annan tug kílóa af fíkniefnum, en samkvæmt heimildum fréttastofu Stöðvar 2 er um kókaín að ræða. Þetta magn af efninu er metið á hundruði milljóna.
Þetta er líklega eitt stærsta fíkniefnamál sem komið hefur upp hér á landi. Málið kom upp á Keflavíkurflugvelli þann 12. maí síðastliðinn og voru fjórir úrskurðaðir í gæsluvarðhald í kjölfarið. Málið á uppruna sinn í Frankfurt í Þýskalandi en lögreglan á Suðurnesjum í samstarfi við þýsk lögregluyfirvöld, tollgæsluna á Keflavíkurflugvelli og lögregluna á höfuðborgarsvæðinu vinna nú að rannsókn málsins.
Undanfarin misseri hefur kókaín verið mikið í umræðunni, en talið er að notkun á efninu sé í meira magni nú en nokkru sinni áður.