„Þér er boðið til Ísrael ásamt barninu þínu. Barnið þitt elskar Ísrael og gyðinga. Ég held að barnið þitt yrði drepið í Palestínu.“
Svo hljóða skilaboð sem Aníta Arndal fékk frá ísraelskum manni sem kallar sig josef_biton á Instagram. Svo virðist sem það eina sem Aníta hafi gert til vekja þessi viðbrögð hafi verið að styðja Hatara og baráttu Palestínumanna á sínu eigin Instagram. Aníta er að öðru leyti ekkert tengd Hatara.
Josef þessi gekk þó enn lengra og byrjaði að fótósjoppa myndir af börnum Anítu. „Hann tók mínar eigin myndir og setti inn á Instagram story hjá sér, af börnunum mínum. Mjög ógnvekjandi,“ segir Aníta í samtali við DV.
Hún segist ekki hafa hugmynd um hvernig þessi maður fann aðgang hennar. „Kannski er hann að fylgja Hatara, sem endurpóstaði myndinni sem ég setti á sitt Instagram. Er bara smá í sjokki yfir þessu fólki,“ segir Aníta. Auk fyrrnefnds manns sendi annar aðili, lidorshamba, skilaboð þar sem hún var kölluð tík.
Eins og gefur að skilja finnst henni þetta mjög óþægilegt, ekki síst fyrir þær sakir að maðurinn gerði börn hennar að umtalsefni. „Ég fékk mjög mikinn fiðring í magann og þetta er búið að setja smá í mér síðan ég fékk þessi skilaboð. En ég ákvað að blokka þetta strax! Að sjálfsögðu styð ég enn þá Palestínu og Hatara út í eitt og þessi skilaboð geta ekki hrætt mig. Ég er ekki að fara að skipta um skoðun á Ísrael út af svona aumingjum sem senda fólki svona ill orð,“ segir Aníta.