„Ég ætla ekki að afsaka það að ganga ekki fyrr varanlega frá hræinu, það var til skammar eins og fram hefur komið og ég verð að lifa við það. Þetta mál og þessi fréttaflutningur hefur hins vegar komið mjög illa við mig og fjölskyldu mína, en ég á fjórar ungar dætur,“ segir Bjarni Páll Vilhjálmsson, eigandi hestaleigunnar Saltvík í Norðurþingi. Eins og DV greindi frá á fimmtudag lá hestshræ í hólfi hestaleigunnar í um mánaðartíma, rotið og maðkétið. Þess má geta að Bjarni er varamaður í Skipulags- og framkvæmdaráði Norðurþings sem vinnur að Umhverfisstefnu Norðurþings um þessar mundir.
Bjarni bendir á að svo hafi háttað til að hann var nýbúinn að farga hræinu endanlega þegar fréttin birtist á dv.is.
„Ég komst með vinnuvél að hræinu og týndi leifarnar í skóflu til förgunar. Allt of seint en málið er þar með frágengið. Ég fékk svo ábendingu um fréttina seinni partinn frá dóttur minni.“
„Hræið kom undan snjó og fannst þann 18. apríl eins og komið hefur fram. Ég gekk frá hræinu sem var nánast uppétið undir plasti og grjóti, í laut í hvarfi við alla mögulega umferð þarna við sjóinn þar sem illmögulegt var að komast að með dráttarvél vegna aurbleytu þessa daga í apríl.“
Bjarni Páll segir alrangt, sem ráða má af frétt DV, að vatnslækur þar sem hestar hans brynna sér, hafi verið í hættu vegna hræsins. Þrátt fyrir ekki mikla fjarlægð hafi hræið verið hulið ofan í laut þar sem erfitt var að komast að því.
„Við fjölskyldan höfum rekið okkar starfsemi hér í 20 ár, að við héldum við góðan orðstír, og verðum að lifa við þá staðreynd að þarna varð mér á. Ég verða að taka þeirri umfjöllun sem því fylgir, hún er sönn í sjálfu sér,“ segir Bjarni Páll en bendir á að aðstæður hafi þó verið erfiðar.
Bjarni Páll hefur haft samband vi MAST og óskað eftir úttekt á búinu, vegna fréttaflutningsins, bæði aðbúnaði og ástandi allra 119 hrossanna í stóðinu, sem og umgengni og ásigkomulagi aðstöðunnar í heild. Vill hann með þeirri úttekt leiða í ljós að almennt sé starfsemi hans ekki ábótavant þrátt fyrir þetta atvik sem nú er úr sögunni.
