Sænska fataverslunarkeðjan Lindex er nú að hefja sókn inn á nýjan markað en hún opnar nú 700 fermetra verslun í verslunarmiðstöðinni Field‘s í Kaupmannahöfn. Þetta er áframhald á sókn Lindex á erlenda markaði og er sérleyfishafi Lindex á Íslandi, LDX 19, í samstarfi við móðurfyrirtækið í Svíþjóð um þessa sókn inn á danska markaðinn.

Jótlandspósturinn skýrir frá þessu. Fram kemur að í nýju versluninni verði allar vörulínur Lindex seldar. Haft er eftir Johan Isacson, hjá Lindex, að Danmörk sé spennandi markaður og að fyrirtækið hafi lengi haft áhuga á að opna verslun þar í landi.

Fram kemur að LDX 19 reki sex verslanir hér á landi auk netverslunar.

Tæplega 9 milljónir gesta koma árlega í Fields sem er stærsta verslunarmiðstöð Danmerkur en hún er rúmlega 79.000 fermetrar að stærð.

Lindex er með 470 verslanir í 17 löndum auk netverslana í 30 löndum. Keðjan stendur sterkt að vígi á Norðurlöndunum með 201 verslun í heimalandinu Svíþjóð, 99 í Noregi, 68 í Finnlandi og 6 á Íslandi.