Katrín Jakobsdóttir forsætisráðherra hefur óskað eftir því að dómsmálaráðuneytið skoði mál Erlu Bolladóttur sérstaklega. Í viðtali við Mannlíf á dögunum kom fram að Erla væri sár út í Katrínu. Erla er sú eina í Guðmundar- og Geirfinnsmálinu sem fékk mál sitt ekki tekið upp að nýju síðasta haust.
Í Fréttablaðinu í dag er haft eftir Katrínu að hún hafi hitt Erlu og óskað eftir því að ráðuneytið skoði hennar mál sérstaklega. Erla sat í gæsluvarðhaldi í 239 daga eftir að hún var handtekin í desember 1975. Hún var sakfelld fyrir rangar sakargiftir.
Í samtali við Fréttablaðið í dag segist Erla ekki hafa heyrt af því að málið sé til skoðunar í ráðuneytinu.
„Staðan er sú að eina manneskjan í heiminum sem er sek fundin um Guðmundar- og Geirfinnsmál í dag er ég. Aðrir sem sakfelldir voru hafa verið sýknaðir og þeir sem sviptu okkur frelsi, pyntuðu árum saman og sakfelldu okkur á endanum hafa aldrei verið spurðir út í hegðun sína í þessu máli, með einni undantekningu sem þó opinberaði óheiðarleika þeirra,“ segir Erla í viðtalinu.
Í viðtalinu við Mannlíf í byrjun maí sagði Erla það þungbært að lifa með dómnum allan þennan tíma og að sök hennar standi sé áfall út af fyrir sig.